सशस्त्र सेना

आपल्या अध्यक्षीय कारकिर्दीत त्यांनी सैन्यदलाच्या विविध कार्यक्रमांना भेटी दिल्या.

भारतीय हवाई दलाच्या सुखोई ३० या लढाऊ विमानातून उड्डाणाचा अनुभव जी. आय सूट घालून २५ नोव्हेंबर २००९ रोजी घेतला. या लढाऊ विमानातील त्यांचा प्रवास हा ज्या महिलांना अशा धाडसी लढाऊ दलात काम करण्याची इच्छा आहे अशा महिलांसाठी  प्रेरणादायक आणि स्फूर्ती देणारा अनुभव होता. तसेच आपल्या जवानांचे नीतीधैर्य वाढविण्यासाठी सुद्धा होता. रशियाचे अध्यक्ष दिमिगी मिदवेदेव्ह यांनी ताईंच्या धाडसी कार्याबद्दल फोन करून ताईंचे अभिनंदन केले.

सैन्यदलाने आपल्या सद्भावना प्रयोगाअंतर्गत आणि जम्मू-काश्मिरच्या दुर्गम भागत अनेक सदिच्छ शाळा सुरु केल्या. अत्यंत रास्त आणि परवडणा-या फीमध्ये गरिब मुलांना गुणवत्तापूर्ण शिक्षण मिळावे हा त्यामागचा मुख्य हेतू होता. हे विद्यर्थी ज्यावेळेस दिल्लीला सहलीसाठी येत तेव्हा ताई त्यांची व्यवस्था चांगल्याप्रकारे होईल याकडे जातीने लक्ष देत असत. आपल्या कामातून वेळ काढून त्या या मुलांशी संवादही साधत.

भारताच्या राष्ट्रपती असल्याने ताई अनेक कल्याणकारी संस्थेशी संबंधित होत्या. सैन्यदल पत्नी कल्याणकारी संघटना (आर्मी वाईव्हज वेल्फेअर असोसिएशन) आणि हवाईदल पत्नी कल्याणकारी संघटना यांच्या कार्याशी त्यांचा निकटचा संबंध होता.

प्रतिवर्षी स्वातंत्र्यदिनाच्या एक आठवडा आगोदर स्वातंत्र्यसैनिकांचा सत्कार ताईंच्या हस्ते राष्ट्रपती भवनात केला जात असे. त्यांना मानसन्मान देत त्यांच्याशी चर्चा करुन त्यांची गा-हाणी ऐकली जात असत. मुख्यतः त्यांची गा-हाणी ही पेन्शन अथवा वैद्यकिय उपचारासंबंधी असत. ती त्वरीत सोडविण्यासाठी ताई संबंधित सरकारी खात्यांशी संपर्क साधत आणि तो प्रश्न सुटला आहे याची खात्री करुन घेत असत.

अत्यंत दक्ष आणि उत्तम गुणवत्ता असलेले सैन्यदलाचे अश्व दल हे राष्ट्रपतींचे संरक्षक दलाच्या सेवेत असत. त्यांचे महत्वाचे काम हे राष्ट्रपतींच्या सदा समवेत राहणे आणि त्यांचे संरक्षण करणे होय. आपल्या कार्यकाळात त्यांनी या दलाच्या ‘गार्ड चेन्जिंग सेरेमनी’ हा जनतेसाठी खुला केला.